ADB-მზად ვართ გავზარდოთ ეფექტიანი ინფრასტრუქტურული პროექტების ფინანსური მხარდაჭერა

ADB-მზად ვართ გავზარდოთ ეფექტიანი ინფრასტრუქტურული პროექტების ფინანსური მხარდაჭერა

აზიის განვითარების ბანკის (ADB) მიერ   რეგიონული განვითარებისთვის გამოყოფილ 700 მლნ. დოლარის ოდენობის პროექტზე იმსჯელეს საქართველოს რეგიონული განვითარებისა და ინფრასტრუქტურის სამინისტროში გამართულ შეხვედრაზე. მინისტრმა მაია ცქიტიშვილმა და აზიის განვითარების ბანკის  მუდმივი წარმომადგენლობის დირექტორმა იეშიმ ელჰან-კაიალარმა რეგიონებში მიმდინარე და დაგეგმილი ინფრასტრუქტურული პროექტები განიხილეს, რაც მნიშვნელოვანია  ტურისტული პოტენციალის,  მცირე და საშუალო ბიზნესის  განვითარების კუთხით.
,,ვფიქრობ, რომ ურთიერთანამშრომლობის ძალიან დიდი პოტენციალი გვაქვს. მაგალითად, ზუგდიდი-მესტიის, თელავი-ახმეტის მიმართულებით, თბილისში, როგორც რეგიონული განვითარების ცენტრში. ეს თანამშრომლობა ხელს შეუწყობს, როგორც ტურიზმის, ისე აგრობიზნესის განვითარებას“-განაცხადა მაია ცქიტიშვილმა.
იეშიმ ელჰან-კაიალარმა აღნიშნა, რომ საქართველოს მთავრობასთან მჭიდრო პარტნიორობის ფარგლებში, ბანკი  გააფართოვებს  პორტფელს,  რაც ახალი ეკონომიკური შესაძლებლობების გაჩენას შეუწყობს ხელს.
 დახმარების პროექტი  ითვალისწინებს საქართველოს  ინტეგრირებულ ურბანულ განვითარებას და  ინვესტირების პრიორიტეტული მიმართულებების შერჩევას.  
მინისტრმა მადლობა გადაუხადა  აზიის განვითარების ბანკის (ADB) მუდმივი წარმომადგენლობის დირექტორს  თანამშრომლობისა და იმ პროექტების დაფინანსებისთვის, რომლებიც კონკრეტული მუნიციპალიტეტების და მთლიანად ქვეყნის ეკონომიკურ ზრდას უზრუნველყოფს. 
თავის მხრივ, იეშიმ ელჰან კაიალარმა განაცხადა, რომ ბანკი მზადაა გააგრძელოს საქართველოსთან თანამშრომლობა და გაზარდოს ეფექტიანი ინფრასტრუქტურული პროექტების ფინანსური მხარდაჭერა.